Thursday, February 9, 2012

وشوش



فى المترو ولد معرفش اسمه، يبصلى ويبتسم .. ابتسمله فيقوللى : شكلك خلصان، ولاد الكلب راميين غاز حراق المرة دى ، اضحك ويضحك ويعدى الطريق من غير ما اسأل عن اسمه او يعرف انا مين

فى المترو ولد اسمر طويل ورفيع معرفش اسمه ومش فاكرة قوى انى قابلته بس يبصلى ويبتسم .. ابتسمله فيقولى: متبقيش تدخلى النهاردة من غير نضارة ولاد الكلب مستلمين خرطوش ياما، اضحك ويضحك ويعدى الطريق ما اسأل عن اسمه أو يعرف أنا مين.

فى المترو بنت صغيرة تبص لكوفيتى وتبتسم، ابتسملها فتسألنى: لسة رايحة النهاردة؟ اقولها لا روحت استحميت ونمت وادينى راجعة، تقوللى طيب ابقى كلى قبل ما تدخلى ومتعمليش زى ما عملت امبارح. نوصل وننزل ونروح سوا على شارع منصور من غير ما اسأل على اسمها ولا تعرف انا مين

فى الطريق بنشوف وشوش بعض، بنعرف بعض، والالفة بينا دفا .. مع قسوة العيون اللايمة من الكارهين واللى مش فاهمين، واللى عمرهم ما هيعرفوا يعنى ايه تنقسم روحك على اجسام خلايق شايلة الحلم نفسه هناك .. عند الميدان.