اشتاق رائحة زهر البرتقال
عاوزة فانوس بشمعة
وفانوس بطيخة اخضر لمبته بيضا مش صفرا ومبيغنيش
لا اريد للمطر ان يتوقف ، ولا اريده سيلا جارفا بل فقط مطر لطيف يجعلهم ينكسون رؤوسهم بينما يهرعون فى سيرهم
يجعلهم يتواضعون رغما عنهم ويهربون منه خشية الطهر الاجبارى
قرآن بصوت عبد الباسط عبد الصمد "سورة مريم تحديدا"0
خالتو زوبة فعلا واحشانى
درة مشوى فى الغيط عند خالتو امينة امسكه اتدفى بيه ومكلوش
النار والعة فوق السطح هناك وسندوتشات سكر جوة عيش لسة حالا مخبوز
فيلم سبارتاكوس مش عارفة ليه بس فيلم سبارتاكوس
ريحة زهر البرتقال فعلا واحشانى
لعبة الطيارات فى الاتارى القديم يوم الخميس بعد الواجب مع ان محمد دايما بيكسبنى
انام وانا اقصى احلامى فى الدنيا باص المدرسة يعطل ومقومش الساعة خمسة ونص الصبح من تحت بطانيتى البنى التقيلة
خناقة ماما وبابا الصبح عشان اشرب اللبن
عياط محمد وماما بتسرحله شعره
نومه على كتفى فى الباص واحنا متكلفتين فى بعض من السقعة
بونبون وجدى اللى كان بيلزق فى ايدى كل يوم
محاولات محمد الفاشلة لمعاكسة لوسى " فاتنة كى جى تو "0
رجلى اتكسرت اول مرة فمارس ، ممكن يكون بيتهيالى بس شبه متأكدة انها اتكسرت اول مرة فمارس
بسكوت بيمبو تقريبا مكنش بشتريه الا والدنيا بتمطر فى مارس
الحزن فمارس مش مؤلم
كل حاجة حلوة حصلت فى مارس
وكل حاجة وحشة بدأت من مارس
Posts
2 comments:
تدوينه جميله بس فعلا الواحد سعات بيفتكر حجات كتير ويحس انها ملهاش علاقه ببعض
اه هو فعلا شكل من اشكال التداعى
انت عامل ايه ؟
Post a Comment