انت ازاى تقول لجناب السيد المخبر بتفتشنى ليه ؟
انت فاكر نفسك فى دولة محترمة ؟
تكونش فاكر نفسك مواطن وليك حقوق؟
ولا تكون فاكر ان المفروض يبقى فى سند قانونى للاعتداء على حريتك وخصوصيتك؟
انت ازاى ترفع عينك وسيدك المخبر بيكلمك؟
ثم انك ازاى تجرؤ تموت وهو بيأدبك ويعلمك ؟
لا وكمان يمكن تكون متصور ان موتك ولا عيشتك ليها تمن
ولا ان لما اسيادك فى وزارة الداخلية اعزها الله لما يأدبوك وعشان انت ابنهم يقسوا عليك شوية فيشوهوك ويموتوك الدنيا هتتقلب عشان انت مت
ولا عشان اتعذبت
داهية صحيح لتكون فاكر ان ليك سعر
ولا فاكر ان حد هيقول كلمة حق ولا الطبيب الشرعى هيقول انك مت من التعذيب؟
ولا ان موتك هيبقى ليه اثر
المصيبة بقى ان غيرك يفتكر انه من حقه عشان انت مت انه يفتح بقه ولا يقول ده مات ليه
ولا يقول مش من حق اسيادنا يعاملونا كدة
اخرس يا كلب منك له
انت مصرى
يعنى كلب ولا تسوى
يعنى ملكش سعر يعنى نبيع ونشترى فيك كيف ما بدا لنا
يعنى تموت تعيش واحد المهم تعيش كلب اخرس وتموت كلب اخرس واعور كمان
فهمت يا واد منك ليه؟
Posts
2 comments:
فهمت..للأسف
حرّمت يا باشا
سيبنى وحياة النبى
ربنا يعلّى سعادتك
.
.
.
الصراحة
الصراحة
هوة دة اقل واجب يتعمل فينا
شكراً
Post a Comment